政情：墮落姊弟飯局對泣
當一個政治人物頭上嘅政治光環慢慢減退，身邊有權有勢嘅人亦會逐漸疏離，久而久之，只能夠同低政治能量嘅人為伍，呢啲就係政治現實。好似曾蔭權同陳方安生咁，一個快將卸任，之後仲會周身蟻，一個就大勢已去，講嘢無人理，兩個人上個禮拜一就被我哋撞破食飯密斟。其實兩人處於咁嘅境況，仲有乜嘢好斟？睇嚟都係抱頭痛哭、牛衣對泣喇。
朱培慶當年「避難所」
民主阿婆同煲呔曾，上個禮拜就喺有高官飯堂之稱嘅灣仔謝斐道富瑤酒家食飯，即係廣播處長朱培慶當年同艷女Coco翹手行街被記者撞破，佢急起上嚟匿埋嗰間酒樓。據知煲呔曾同民主阿婆餐飯仲有其他人，其中一個仲係撐住拐杖。究竟佢哋傾咗啲乜，又同乜人食飯呢？認真惹人遐思。
其實，兩個政治能量咁低嘅人，仲可以做得乜嘢吖，最多就係唏噓過去風光嘅日子，抱頭痛哭一番囉。無計啦，民主阿婆由當年一人之下、萬人之上嘅政務司司長，淪為一個普通時事評論員，得閒走出嚟插政府兩句。煲呔曾更加大勢已去，成個政府無人聽佢支笛外，「貪曾」單醜聞分分鐘令佢周身蟻，卸任後都會畀老廉盯住，日日有得震無得瞓，點會寬容呀。
煲呔曾同民主阿婆呢兩姐弟，當年曾經諗住拍住上，一個做特首，另一個就做政務司司長，點知好景不常願望落空，民主阿婆惟有霸住道德高地，成日批評政府，其實都係小罵當幫忙，民主阿婆無做議員後，周不時仲會批評煲呔曾幾句，好似當年五區公投咁，佢就寸過煲呔曾唔出嚟投票係左閃右避、係自由社會嘅大笑話。
依家政圈各方都話要大和解，今次餐飯唔通又係大和解？其實佢哋兩個根本好老友，○六年已經被人踢爆曾經一齊去澳門吃喝玩樂，事後煲呔曾仲承認兩人成日一齊玩。
同前行會成員敍舊
睇佢哋兩個人今時今日落難都仲食飯密斟，就知佢哋幾老友喇。民主阿婆就透過身邊人回覆，話只係同班前行會成員敍舊，無咩特別喎。