中環出更：馬鴻銘3歲女 習武防綁匪
盛傳有綁匪出沒，搞到人心惶惶，唔少家長都好擔心寶貝仔女出入嘅安全。佳寧娜飲食集團太子爺馬鴻銘（John）同太太、「玩具大王」蔡志明千金蔡加敏（Carmen）尋日現身沙田馬場，捧潮州「家己冷」嘅團體馬「綠豆爽」，已有兩子一女嘅John坦言，好擔心仔女嘅安全問題，會考慮請番個保鏢跟到實，仲畀仔女學跆拳道傍身添！
John同Carmen一向對大女靄翹及一對孖仔寵愛有加，對於有綁匪光天化日企圖捉走小朋友，兩夫婦都覺得好震驚同擔心。Carmen話，囡囡去年入讀幼稚園，自己一向有送返學接放學，仲會教囡囡遇到陌生人要小心，依家考慮緊請保鏢。佢笑言，有畀愛女學跆拳道，不過囡囡只得三歲幾，暫時都係玩吓嘅啫！
名人冒雨拍拖入馬場
卓妮又見到自由黨榮譽主席田北俊，佢入場為佢同太太嘅愛駒「風雲武士」打氣，結果愛駒大熱奪冠，帶挈田少袋走五十一萬幾獎金。講到孫仔安全問題，佢話唔會特別緊張，事關愛女一向好小心，自己去唔到接放學，都會搵工人湊孫。佢仲大讚孫仔讀嘅學校保安嚴密，一定要「騷」個證件至可以接走學生，有次佢忘記帶證，校工雖然認得佢，都唔畀佢帶走個孫。
尋日上午滂沱大雨，但無阻一眾名人到場出席名錶盃賽，唔少人仲係拍住拖到場添。喜運佳鐘錶主席蔡加讚同爸爸蔡志明及媽媽蔡李惠莉溫馨到場，溥儀眼鏡店老闆邱子傑、愛沙尼亞駐港名譽領事林建康、太子珠寶鐘錶主席鄧鉅明及執行董事朱繼陶都帶埋愛妻恩愛現身。卓妮見女士們都戴上珍貴名錶，佢哋異口同聲話係老公送嘅，真係甜到入心。
卓妮