煲呔曾政府濫用公帑、任人唯親，用超高薪請咗大批毫無相關經驗嘅政治助理，五年下來唔單止全無政績，好多市民連佢哋個名同個貓樣都唔認得。候任特首辦主管羅范椒芬尋日就喺電台承諾，下屆政府嘅政治助理肯定會同現屆嗰啲唔同，會好似佢哋嘅頂頭老細候任特首梁振英咁，更多主動落區直接接觸市民，起碼要等啲交稅出糧畀班政助嘅納稅人，記得佢哋個名同個樣吖！
