我哋前日報道過，多個建制派政團近期都好積極咁爭取「福建幫」支持，以求喺九月立法會選舉坐穩港島區議席，當中提到新民黨主席葉劉淑儀力捧閩籍青年「十優狀元」施俊輝，可能會排喺佢張名單出選，矛頭直指同樣想爭福建票嘅民建聯鍾樹根同工聯會王國興。不過報道一出街，施俊輝即刻好緊張咁發電郵畀各福建社團聯會會員，剖白自己無意同兩位建制派嘅重量級議員爭位坐喎。
施俊輝尋日下午發出電郵，內容話「現階段只希望累積經驗，專注南區地區工作，不作他想」，又話年初「福建幫」嘅拜年活動，葉太根本就冇出席，只有黨副主席田北辰同佢代表出席喎。
施俊輝又話，希望建制派團結一致做好協調，避免出現你爭我奪嘅情況，自亂陣腳讓對手有機可乘。施俊輝咁緊張，足證各個建制派都想力爭「福建幫」嘅祝福，一旦企錯位歸錯邊，後果可能好嚴重。