政情：黃洋達拉埋長毛坐監
外號「皇上」嘅人民力量成員黃洋達，早前因衝擊替補機制論壇被判入獄三個禮拜，但獲准保釋外出等候上訴。但由於黃洋達計劃參加九月立法會選舉，如果喺提名或者投票時佢咁啱上訴失敗坐緊監，依例就會喪失參選資格。所以佢打算喺下周向法院申請放棄保釋即時入獄，等佢可以早完成刑期報名參選。黃洋達仲邀請同案被判入獄兩個月嘅社民連主席梁國雄（長毛）一齊入冊，但就畀長毛請佢食檸檬。
人民力量尋日選出第二屆執委會及決定參選立會名單，港島區由主席劉嘉鴻領軍，九龍東由「皇上」出戰、九龍西由現任立會議員黃毓民爭取連任、新界東就派出「慢必」陳志全、新界西就會分拆兩張名單，包括現任議員陳偉業同區議員麥業成。
長毛冷淡回應
黃洋達喺會後透露，日前佢諗出自願入冊保參選權呢條「絕橋」後，曾經介紹過畀長毛參考，甚至想約埋一齊入冊，互相照應，但長毛就用冷淡嘅語氣話要諗吓先。梗係喇，黃洋達刑期得三個星期，長毛就長達兩個月，而且一旦入冊就要剪短佢嘅招牌長髮，當然唔會同佢一齊癲喇！