政情：呂迪明代夫出征入政府？
特首選舉期間企得好前，幫候任特首梁振英（CY）幫到出晒面嘅北區區議員劉國勳，喺CY當選之後盛傳會加入政府；不過最近就傳出風聲，劉國勳加入政府嘅意願唔高，反而佢老婆就想申請加入新設立嘅文化局做政治助理，大有代夫出征嘅意味。
據了解，身為區議會選舉「票王」嘅劉國勳因地區實力夠厚，所以無論係佢自己，定係個黨都唔想佢辭職入政府，以免好似前南區區議員陳岳鵬辭職加盟特首辦咁，得失班選民。反而劉國勳太太、喺演藝學院畢業嘅呂迪明（Casta)，一向好熱心文化事業，加上曾幫CY唱競選歌曲，成功機會唔細。
Casta喺演藝學院取得學士學位，之前喺梨木樹做咗幾年地區工作，同市民溝通可以話駕輕就熟。以上種種條件都合晒CY嘅要求，但最後成唔成事，仲需睇佢所屬政黨民建聯肯唔肯推薦佢。