政情：泛民技窮 咬唔入CY
每逢立法會選舉，各黨派都要搵啲議題去爭曝光攞支持，其中泛民主派不外乎都係鬧政府，等七一時多啲市民走上街，為喺九月份舉行嘅選舉搶先造勢。今年立法會選舉適逢政府換屆，插現屆政府頂多都係插到七一；轉攻候任特首梁振英（CY），由佢當選至今插咗成個月成效不彰，好似練咗鐵布衫咁刀槍不入，有時仲會將子彈反彈射番自己。有泛民中人直言對「倒梁」已感技窮，令佢哋好懷念喺特首選舉落敗嘅唐英年（唐唐），因為如果頻頻爆醜聞、又成日講錯嘢嘅唐唐當選，佢哋依家就唔使憂冇嘢好鬧喇！
抽水夕陽政府行唔通
今屆立法會選舉將於九月九日舉行，七一大遊行成為泛民黨派最重要嘅造勢機會，但想市民上街，都要有議題先得架！煲呔曾被爆連串貪腐醜聞，本應係最好嘅抽水搶票對象，但眾所周知佢早已係夕陽特首等收工，唔少市民連鬧佢都覺得嘥心機，不如期望新一屆政府上場撥亂反正。再講煲呔曾點衰都唔會過到七一，仲有成兩個月先投票，泛民惟有將目標轉向CY。
之不過CY當選咗成個月，泛民嘅倒梁計劃都冇咩進展。過往煲呔曾同唐唐做騷出巡，差不多每次都搞到一鑊泡，唔係有人掟粟米斑塊飯，就係要避走地鐵，出巡變擾民。相反CY當選後幾次落區，社民連雖然都有踩場示威，不過，不但冇釀成衝擊場面，CY仲多次主動走入示威者人群，同社民連前主席陶君行等友善握手。阿陶唔握手又怕畀人話冇風度，結果第二日啲報紙就出晒佢哋同CY嘅歡顏握手相，好似「大和解」咁款。
街坊投訴白鴿亂咁鬧
而成日畀人話係「唐營B隊」嘅白鴿黨，喺選舉期間至CY當選初期都經常鬧CY，但原來白鴿黨不停收到街坊投訴，叫佢哋唔好成日人哋未上場就鬧定先，應該畀個機會CY。而且投訴嘅並非全部係左派街坊，有啲係佢哋嘅傳統支持者。所以最近白鴿黨都疑似收晒聲，免得流失街坊嘅支持。
泛民中人就慨嘆，如果唐唐當選就好喇！因為淨係追番唐唐啲婚外情、私生子同僭建醜聞，都已經有排講，何況唐唐仲成日語出驚人講錯嘢，真係唔憂冇議題。唔怪得佢哋要做「唐營B隊」啦。