中環出更：葉振南代理紅酒攞大獎
藍帶啤酒亞洲區總代理葉振南（Stephen）年前開始做埋葡萄牙紅酒代理生意，結果深受好酒人士歡迎，銷路急升，帶挈酒莊發大財。
卓妮日前見到Stephen，佢好開心話，早前親身飛往葡萄牙，得到酒莊莊主熱情款待，仲頒咗個「最佳銷售獎」畀佢添！
莊主邀赴葡萄牙遊覽
Stephen之前同卓妮推介過2009年葡萄牙紅酒Herdade Das Albernoas，並引入到本港酒樓及超市，由於佳釀價廉物美，引入短短大半年，已經賣咗十幾隻櫃，逾十五萬支。支酒咁賣得，酒莊莊主梗係高興，月初就邀請Stephen到酒莊遊覽葡萄園，莊主太太仲親手炮製皮脆肉嫩嘅葡萄牙乳豬畀佢食。
Stephen話，整個旅程最令佢難忘感動嘅，係當到達酒莊時，遠遠已經見到莊主插咗支五星紅旗歡迎佢，表明對中國人嘅重視。「最佳銷售獎」係由酒莊公司每年頒發予銷售額最高嘅代理商，好少華人得到呢個獎，Stephen覺得與有榮焉。