中環出更：全國青聯聚南沙齊齊「腦震盪」
匯聚唔少富二代嘅全國青聯，兄弟班向來齊心，為思考未來路向，早前齊齊抽空遠赴南沙「腦震盪」，全國青聯副主席陳仲尼（Rock）與鄭志剛齊任團長，而霍啟剛就帶頭贊助食宿，帶大家入住家族旗下嘅南沙酒店，等兄弟至安心。傾完正經嘢後，啟剛就拉隊去參觀南沙遊艇會，喺藍天碧海下吹吹春日涼風，不知幾爽。
為期兩日嘅集思會，行程濃縮，當大家抵達南沙後，個個十足傾國家大事咁認真，又開會，又討論，仲做埋論述，交足功課。今次同行有四十幾位「全青」兄弟，包括保良主席梁寶珠囡囡林玉茵（Maya）、百仁基金主席施榮忻、中華出入口商會副會長許華傑、立法會議員林健鋒兒子林凱章、議員梁君彥公子梁宏正、莊士集團太子爺莊家彬等。
關注八、九十後發展
阿Rock喺會後話，大家有共識將會關注更多八十後、九十後嘅發展，包括住屋、教育等需要，但做政策研究唔可以空口講白話，會考慮搵專業機構，認真地做。Maya就話，一班全青成員有意成立「師友計劃」，由佢哋擔任大哥哥、大姐姐，同時下大專生暢所欲言，薪火相傳喎。
卓妮