本報日前踢爆教育局副局長陳維安（圖）應徵做立法會秘書長，接替即將喺九月退休嘅現任秘書長吳文華。立法會前日討論捍衞學術自由嘅議案，由於教育局局長孫明揚入院切除甲狀腺腫瘤，陳維安於是代表孫公出席發言，之後仲甜笑回應過檔立法會嘅傳聞。
話說當晚會議結束時，一眾記者上前問陳維安係咪會過檔立法會打工，當佢一聽到「立法會」三個字就即刻耍手擰頭，淨係話自己「無嘢講」，仲行快兩步企圖拋離追訪嘅記者。不過，從陳維安笑住回應嘅態度嚟睇，七一之後應該唔使驚無工開喇。
雖然陳維安一向被公認為表現麻麻，但佢就盡得政務司司長林瑞麟嘅真傳，前日發言時充分發揮出「人肉錄音機」嘅本色，強調本港法律同制度充分保障院校自主同學術自由，唔會受到個別人士言論嘅影響喎，佢兩次發言都差唔多用咗成半個鐘，但全程都係無料到。
