政情：龐愛蘭美男計鬥盛女
候任特首梁振英競選期間，不時帶同自己喺外國讀緊博士學位嘅囝囝梁傳昕出嚟拉票，由於傳昕高大有型，效果出奇咁好。有見呢招宣傳咁成功，搞到有意參加立法會新界東直選嘅沙田區議員龐愛蘭（Scarlett）都抄橋，諗住帶埋囝囝出嚟拉票，希望吸納到多啲「粉絲」喎。
Scarlett個仔今年十九歲，現喺澳洲讀緊醫科一年級，個仔高高大大，樣貌都幾討好，如果佢九月肯返港幫媽咪拉票，效果一定唔差。不過，佢就笑言，除非幫阿仔買晒機票，加埋軟硬兼施「氹」阿仔，否則唔使旨意喎。
做咗多年禁毒工作嘅Scarlett，多年來識落唔少青少年，個個都外表四正，如果全部出嚟幫手，或者對選情有幫助。Scarlett被指同代表民建聯出選新界東嘅葛珮帆（EQ）形象相似，EQ近日專攻女性議題，早排仲大講「盛女」，如果兩人都順利參選，隨時會出現靚仔鬥盛女局面。