政情：得福建票得港島 建制派爭崩頭
「福建幫」每逢選舉年都係兵家必爭嘅票倉，更流傳如果某候選人一旦獲福建幫祝福，立法會港島區議席基本上就可以手到拿來。九月立法會選舉臨近，據聞建制派最少有三張名單正各出奇謀力爭福建幫嘅支持，除咗民建聯東區區議會主席鍾樹根會獲得福建幫「祝福」外，新民黨主席葉劉淑儀更有意派出閩籍黨員排第二，意圖大打鄉情牌博取福建幫支持。
立法會港島區議席將會由六席增加到七席，各大黨派都蠢蠢欲動想派人爭奪。我哋早前講過，喺北角區擁有龐大勢力嘅福建幫原先想自行派人參選，但喺整體政治局勢考慮後決定打消念頭，預料勢必繼續為建制派名單「抬轎」。不過，福建幫始終實力雄厚，政圈更盛傳「得福建幫得天下」，令建制派名單為咗得到佢哋祝福，一早已各出奇謀暗中較勁。
王國興回歸撼鍾樹根
其中鍾樹根稱得上係東區嘅地膽，地區樁腳穩健紮實，據聞名單中包括資深嘅東區區議員周潔冰，加上有傳佢領軍嘅名單已獲福建幫全力支持，所以贏面都好大。不過，面對工聯會立法會議員王國興可能由新界西重返港島區參選，好可能會分薄鍾樹根名單嘅票源。眾所周知，王國興過去長年喺北角區扎根，亦同福建幫有一定情誼，但離開咗咁多年，未知能否重拾昔日嘅支持。
葉劉捧新人打鄉情牌
除咗王國興外，葉劉掌舵嘅新民黨亦希望喺港島「坐一望二」。據聞葉劉今年初放下身段，帶同某位閩籍年輕人出席福建幫嘅拜年活動，又暗示對方會有份喺佢張名單出選，明眼人一睇就知佢想同福建幫打好關係。據聞呢位年輕人就係葉劉力捧嘅「十優狀元」施俊輝，但福建幫嘅受落程度只係一般。究竟福建幫最後祝福邊張名單，相信好快就有分曉。