世事真係好奇怪，一個尚未坐正嘅老闆，居然比起一個仍然在位嘅老闆更加有用。功夫茶有少少懷疑，嗰一個仍然在位嘅老闆係弱智o架！
成件事係咁嘅，內地同胞雙非孕婦排山倒海來港產子，衍生各式各樣嘅煩惱，甚至引爆「蝗蟲與狗」嘅罵戰，問題困擾咗好耐嘞，現任特首曾蔭權以及食衞局局長周一嶽始終一籌莫展。哈，未來特首梁振英一出聲，話明年私家醫院接收雙非孕婦應該係「零配額」，問題竟然迎刃而解喎，幾鬼死神奇呀。
周一嶽尋日公布，私家醫院已經同意，明年停止接收雙非孕婦預約。至於公立醫院，明年都唔會接收非本地孕婦，衞生署亦唔會簽發預約證明書。
所以話啫，曾蔭權做咗七年特首確係尸位素餐，明明雙非孕婦問題係有辦法處理嘅，佢老闆吖，居然長期放任不管，搞到資源被分薄嘅本地媽媽鬼殺咁嘈。嗰個周一鑊又係廢嘅，未來特首唔出聲就乜都唔做，一出聲就火速辦妥。喂，家陣公立同私家醫院明年齊齊停收雙非孕婦，唔係證明周局長英明神武，只係反映佢老哥過去幾年工作散漫吊吊揈咋！
除咗雙非，仲有單非，對於配偶係香港居民嘅單非孕婦又點樣處理呢？周一鑊話喎，社會有共識應該協助單非孕婦，政府已聯絡四間私家醫院，包括浸會、寶血、仁安以及聖德肋撒，為百多名預產期係今年十二月之前嘅單非孕婦提供分娩服務，亦會發出額外預約分娩證明書，所有在港分娩嘅單非孕婦必須提供結婚證書同埋港人丈夫嘅身份證，宣誓並且授權當局可向內地查核身份。
講到呢度，印證咗一句至理名言：心態決定命運。係o架，你有乜嘢心態，你就有乜嘢命運。梁振英未出聲喝停雙非孕婦之前，特區政府嘅心態咪就係做一日和尚敲一日鐘囉，唔敲鐘就食飯，唔食飯就瞓覺，總之為民請命嘅事係唔會做嘅，香港嘅命運變得滿目瘡痍。一旦未來特首出聲嘞，成班懶骨頭忽然之間精神奕奕，雖然後知後覺，點都好過乜都唔做。即係咁，弱將手下無強兵，官僚唔踢唔識郁，上面嗰個曾蔭權一味貪威識食，下面嗰個周一鑊咪渾渾噩噩囉，直至有人瞄準八月十五踢佢一腳，咁就有反應嘞。
功夫茶又諗起兩句至理名言：世上無難事，只怕有心人。雙非問題並唔係死症，睇下你有冇決心解決嘅啫。過去七年，特區政府冇心肝冇靈魂又冇膽識，蹉跎歲月都不知浪費咗幾多青春。新舊政府即將換屆，拜託梁振英好似應付雙非問題咁，一於實施「庸官零配額」！