原來人民力量決定咗，唔會畀任亮憲出戰九月立法會選舉，黃毓民尋日就向我哋證實咗呢個決定。
選舉係每個政治人物嘅必經階段，但任亮憲咁後生就突然唔選，猶如半退出政壇，真係好耐人尋味。毓民證實，任亮憲唔會參選立法會，仲話見到佢去台灣旅行吃喝玩樂啲相片咁開心，睇嚟唔參選對佢都無乜影響喎。
我哋尋日搵過任亮憲，佢話雖然唔參選，但都會去新界東同港島區幫其他兄弟助選。不過，上述兩區都係豬頭骨區，人民力量叫佢去助選，對佢有幾重用，大家有眼睇。
另外，人民力量喺新界西部署更加大膽，決定分拆兩條名單，一條由陳偉業領軍，一條由麥業成同李偉儀帶隊，毓民話兩席都可能會贏到，先至會咁做喎。