近年網民興起透過改圖、改歌同改影片，「惡搞」煲呔曾政府同其他政客，有網民擔心有關草案通過後，令佢哋稱為「二次創作」嘅「惡搞」行為會變成犯法，損害創作同表達自由。向來鍾意攞威嘅大口湯早前喺未經泛民主派授權下，走咗去同政府講數，最後政府同意讓步提出修訂，訂明只有嚴重損害版權持有人權益嘅「惡搞」先至算係違法。
不過，班網民要求嘅其實係全面豁免「惡搞」行為，炮轟大口湯出賣港人。公文袋為免影響九月立法會選情，決定離棄大口湯，考慮反對整條草案。
大口湯尋日就大呻公文袋無義氣，話會考慮退黨喎。如果無記錯，大口湯之前曾經多次威脅過退黨，但最後次次都退唔成，今次大家又睇吓結局會係點喇。