中環出更：孫大倫捐助港大教授席
香港大學第六屆明德教授席就職禮日前舉行，城中名人依舊踴躍撐場，富士攝影器材主席孫大倫就以父親孫建業名義捐贈，已故著名建築師伍振民嘅太太伍孫雅娜，亦捐贈支持港大嘅骨科生物工程研究。伍太嘅哥哥、鐘錶業老行尊孫秉樞同囝囝孫大為夫婦齊到場打氣，現場氣氛好熱鬧。
孫大倫同大仔孫道弘（Stanley）一早來到，Stanley現任富士攝影董事總經理，打理生意頭頭是道，難怪孫大倫可以放心周圍去。早前孫大倫趁去韓國開會，同太太Betty重遊久違廿年嘅南韓，佢盛讚韓國街頭文化氛圍濃厚，好值得香港學習。
當日唔少鐘錶界老闆都在場，除力撐妹妹嘅孫秉樞，仲有錶廠商會會長蘇永強、鐘錶業總會副主席高鼎國等，大家齊為時間廊母公司寶光國際主席黃創增打氣。黃創增慷慨解囊紀念公司上市四十周年，真有心思。