中環出更：雷生春堂開幕 名人齊飲「梁茶」？
逾八十年歷史嘅一級歷史建築物「雷生春」，經活化後成為浸會大學旗下第十四間中醫藥診所，名為「雷生春堂」，今日就會正式投入服務。雷生春堂尋日舉行開幕禮，唔少政商名人都有捧場，大家仲品嘗嗰度嘅出品涼茶添。之前有人將涼粉變成「梁粉」，即候任特首梁振英嘅支持者，如今涼茶豈不是可以變成「梁茶」？
浸大校董會主席王英偉尋日聯同浸大校長陳新滋、捐贈雷生春大宅嘅雷氏家族代表雷中元、發展局局長林鄭月娥、活化歷史建築諮詢委員會主席陳智思等嘉賓，一齊主持「雷生春堂」開幕禮。到場湊熱鬧嘅仲有雷氏家族另一後人雷添良、協成行集團董事總經理方文雄（David）及百成堂集團主席李應生等。
王英偉話，飲涼茶益處多，如果燥底嘅人，不妨飲多兩杯，估唔到之前挺唐嘅佢對「涼茶」咁捧場喎。不過，佢自言愛食海鮮，搞到個胃好寒，反而要飲薑茶驅寒。佢話，中醫就係咁奇妙，唔可以一條藥方食到尾，要不時把吓脈，因應季節及人嘅體質而改變藥方。
陳新滋賣花讚花香
身兼活化歷史建築諮詢委員會成員嘅David就話，佢好信賴中醫，鍾意中藥材成分天然，副作用少，食得安心啲，仲話自己靠食中藥多年，病痛都少啲喎。陳新滋就賣花讚花香話，中醫療效好，佢憶述有一次患重感冒，點都唔斷尾，後來睇中醫飲涼茶加刮痧，結果兩日就好番。
陳校長仲話，平時都會服用靈芝、西洋參調理身體，難怪佢聲如洪鐘喇。養生有道嘅李應生就介紹大家飲四季皆宜嘅五花茶，唔單只清熱祛濕，仲可以預防感冒添。
卓妮