九巴258P線為早晨特別班次，每日會有兩班車往來洪水橋及港鐵藍田站。居於屯門景峰花園的陳先生每天均需要乘搭此線上班，坦言班次嚴重供不應求，「以前唔經兆康，去到景峰都仲有啲位可以企吓，依家就連上車都難！既然咁多人搭又要加站，點解唔轉做固定路線呢？」
「街坊一路都有要求加班次，九巴今年三月中先加多一班，但都係唔夠！」屯門區議會交運及運輸委員會委員何杏梅表示，市民對上述路線需求甚大，認為九巴應考慮將此路線轉為固定路線，以滿足市民需要。何杏梅又稱，九巴增加班次準則門檻過高，以致「加極都唔夠」，「載客量要達百分之百，連企位都計，對於長途車嚟講呢個要求真係好難達到！」
九巴發言人解釋，釐定各線班次時，會以配合乘客需求為原則，而各線服務時間及班次安排，均按實際需求釐定。就258P線班次問題，發言人僅指會將意見紀錄在案，以作日後改善該線服務參考。