大家對免費派發嘅報章有乜睇法咁呢？功夫茶嘅睇法就係，好心《爽報》收皮啦，鹹鹹濕濕賤賤格格核核突突，教壞細路好冇陰功啫，慘被教壞嘅細路隨時仲係《爽報》員工嘅親生骨肉心肝命椗，對唔住自己祖宗十八代吖嘛。
唔好以為係功夫茶一面之詞喎，有民意基礎㗎。由十八個不同團體組成嘅「反色情暴力資訊運動」，由舊年十二月至今年二月訪問咗七百六十一名青少年、家長以及教師，嘗試了解佢哋對五份免費報章嘅睇法。調查結果發現，《頭條日報》、《都市日報》、《晴報》、《AM730》同《爽報》之中，超過六成受訪者認為《爽報》對青少年嘅道德觀念最有負面影響，百分之十八受訪者認為《爽報》內容最空洞簡單。
除此之外，反色情暴力資訊運動將「報道誇張失實」、「渲染色情」同埋「渲染暴力」等等項目交由受訪者評分，結果《爽報》全部得到最高分，亦即係最誇最淫最暴力。調查團體就建議嘞，《爽報》應該減少渲染色情暴力，政府必須對免費報章採取更嚴厲嘅檢控行動以收阻嚇作用。
咦咦咦，咪住先，建議政府嚴厲檢控《爽報》？呢家嘢大有問和尚借梳嘅味道，事關曾蔭權政府由始至終包庇縱容，任得淫賤黎旗下壹淫媒為非作歹，包括《爽報》在內，次次違反《淫褻及不雅物品管制條例》都係從輕發落，冇可能收到阻嚇作用囉。功夫茶建議，反色情暴力資訊運動改一改自己嘅建議，改為「下屆政府嚴厲檢控《爽報》」，咁就有少少希望阻嚇壹淫媒，從而拯救大量被荼毒嘅青少年。
講到包庇縱容，其實唔止港英餘孽擅於官淫勾結，其實一大班政客都係沆瀣一氣。好似公民黨同民主黨咁吖，曾經收過淫賤黎二千五百萬元捐款，結果呢兩個平時滿口仁義道德嘅政黨就同流合污，助淫為虐。早前立法會有民間團體公審《爽報》，不滿呢一份鹹報誨淫誨盜，收過掩口費嘅公民黨同民主黨就識做嘞，冇聲討，冇圍剿，冇為正義發聲。呢家嘢咪就係受人錢財、替人擋災囉！
所以話啫，大家惟有將希望寄託於下屆政府，仲有就係精明選民。喂，各位選民記住呀，公民黨同民主黨係淫賤黎嘅最佳損友，呢兩個黨係荼毒青少年嘅殘忍幫兇，下次選舉大家識投票啦，唔好將神聖嘅一票投畀見利忘義嘅無恥政客喎。
話時話，既然壹淫媒違反《淫褻及不雅物品管制條例》過百次都未試過重罰，選民利用選票懲罰一下「助淫為虐」嘅政客，都算得上心理補償吖！