政情：婆婆搵錯候任辦伸冤
候任特首梁振英（CY）仲未正式上任，不過喺市民心目中，煲呔曾已經唔存在。話說尋日有市民打電話去候任特首辦伸冤，難為職員要解釋，始終未到七一，市民要訴苦都係要搵番現屆政府o架！
尋日有位六十幾歲嘅婆婆打電話去候任特首辦位處嘅舊政府總部西座大堂，投訴屋企被人潑尿、吐痰。大堂職員費盡唇舌，解釋畀佢聽CY仲未正式上場，點講都應該反映畀現屆政府或者房屋署聽。唔怪得之煲呔曾將「無縫交接」掛喺嘴邊啦，原來條縫同佢一樣早就消失咗。
講開候任特首辦，尋日晏晝四位立法會議員去見CY前，有人送咗幾箱嘢畀CY嘅秘書收，其中一個打開咗嘅箱入面，竟然放有一張摺櫈，莫非呢張就係CY參選期間，帶住落區聽意見嘅摺櫈？