政情：立會扮公正年嘥80萬

好似○九年立法會審批高鐵撥款一役，經濟動力議員林健鋒、專業會議石禮謙（大舊石）同埋工程界代表何鍾泰漏報同高鐵利益，議監會查咗兩年出報告，聲言要訓誡大舊石，點知上到立法會大會，佢咪喺分組表決下逃過一劫。除咗高鐵單嘢，議監會主席梁劉柔芬、霍震霆、金融服務界代表詹培忠同埋「中指黃」黃宜弘等，一年前又被揭漏報多項董事利益，最終求其表示關注了事，連叫罰都懶得叫。

每周返11粒鐘 工作量低

立法會秘書處研究咗多年後，終於提出要搵一位專員處理番議員嘅投訴。以十五年來議監會只收過廿三宗有關利益嘅投訴，同埋近三年立法會申訴部平均一個月收廿四宗市民對議員投訴，呢位專員嘅工作量似乎唔多，所以只屬兼職性質，一個禮拜返十一個鐘頭工，月薪卻有五萬幾蚊，連埋啲雜費一年就大約八十萬蚊。

八十萬蚊一年嘅專員，主要處理議員個人利益、金錢利益以及薪津方面嘅利益，收投訴後查唔查由佢話事，但查完罰唔罰違規議員則由番議監會話事；此外，市民向申訴部畀投訴，專員只會檢視吓啲意見，但唔會採取行動，頂多建議改善相關指引。而民主黨議員甘乃威求愛不遂怒炒助理一類事件，專員直頭唔會處理，似乎請呢位專員有啲聊勝於無。

雖則要諮詢埋全體議員先拍板請專員，但講到尾，議員違規嘅最大懲罰理應被選民以選票踢佢出局，可惜好似上述違過規嘅議員統統都係小圈子功能組別產生，市民根本無票踢佢哋走，尤其林健鋒同大舊石曾經聲嘶力竭話要查候任特首梁振英喺西九比賽漏報利益，點知佢兩個自己又犯同樣嘅錯，仲要錯完又被其他小圈子議員包庇。議員嘅天職係監察政府，但佢哋其身不正，又請人嚟監察佢哋，呢個都唔知係乜嘢世界。