中環出更：維也納音樂會名人聽出耳油

當晚嘅知音人，包括廉政專員湯顯明同女友入境處高官陳詠梅、馬會大董周永健（Anthony）伉儷、香港交易所主席夏佳理（Ron）伉儷、行政會議成員梁智鴻及太太馮令儀、已故船王包玉剛嘅長女包陪慶等。

包陪慶為奶奶學德文

Anthony話從未去過維也納，只係四十年前去過奧地利參觀莫扎特故居。依家有機會親耳聽到美妙樂韻，感到非常開心。Ron太太係奧地利人，每年四月佢哋會去維也納睇「鬼佬大戲」，唯一遺憾係未去過非常出名嘅新年度音樂會，話有機會佢一定去喎。包陪慶丈夫蘇海文都係原籍奧地利，包陪慶話奶奶識德文唔識英文，所以佢特登喺歌德學院惡補德文，依家都聽得明歌劇講乜。

蔡關穎琴（左）希望飛去維也納聽音樂，梁智鴻（中）及馮令儀（右）就話年年都去維也納。

包陪慶（中）與維也納市長Michael Haupl（右）及副市長Renate Brauner（左）喜相逢。

梁智鴻夫婦因工作關係，每年都會去維也納開會。某年梁太喺業界一個頒獎禮上獲獎，大會知道梁太係中國人，搵咗維也納兒童合唱團表演助興，竟然用普通話唱出《茉莉花》，令梁太感動不已。

中華總商會會長蔡冠深太太蔡關穎琴都有捧場，佢仲未聽過正規嘅維也納音樂會，希望退咗休之後飛去當地聽吓。蔡太話，聽音樂多數去現場聽，唔會買唱片，因為成日買完就放埋一邊被遺忘，有時買咗兩隻一樣嘅都唔知。

同場仲有青年聯會常務會董蔡敏思，佢本身都好鍾意音樂，仲畀九歲嘅囡囡Shanice學勻結他、小提琴、打鼓同獨唱，充滿藝術細胞。

卓妮