政情：港大校友歡送本部大樓
為配合九月新舊學制新生同時入學，港大文學院將會搬離本部大樓。尋日港大為大樓搞咗場歡送儀式，多位名人校友紛紛回校緬懷昔日嘅讀書時光。揚威國際嘅港產導演張婉婷同羅啟銳都有出席，七十年代喺港大讀心理系嘅張婉婷難忘昔日喺陸佑堂參加聖誕舞會識男仔嘅往事，但大嘆當年喺舞會上只係「得個跳字」，一個男仔都識唔到。
張婉婷憶述，外貌普通嘅男仔通常會喺舞會上主動出擊找尋女伴。佢話自己好快就受到邀請，但當時就會覺得矛盾，擔心拒絕嘅話其他男仔未必會再邀請佢。
張婉婷仲話，本部大樓嘅古典氣氛係一個適合讀文學嘅地方，而佢就最鍾意喺庭園走廊同棕櫚樹前搵靈感。
羅啟銳就話，佢當年最鍾意望住未被高樓遮住嘅維港同其他同學討論國家大事，又話曾經試過將洗衣粉倒喺本部大樓旁嘅噴水池，當時仲搞到成地都係泡泡。但其他人竟然無責怪佢嘅惡行，反而讚佢諗到個咁好嘅洗地方法。