政情：吳亮星等李國寶打退堂鼓
金融界立法會代表李國寶做咗議員廿幾年，一直有傳今屆佢遇到挑戰者，就係前立法局議員、中銀高層吳亮星。星爺（吳亮星外號）尋日就話，自己唔會「挑戰」李國寶，只會等到佢唔選，自己至出戰喎。
吳亮星做過八年立法局議員，如果佢去硬撼三點不露嘅李國寶，唔係無機會。星爺尋日話，業界觀察到李國寶可能唔選，而業界又覺得中銀可以派出代表，自己先有意頂上，近期都有唔少銀行界人士叫佢去選喎，不過佢自己參選嘅前提係李國寶自動走人，如果佢唔肯走，星爺就唔會主動挑戰。佢咁講係積極地要逼李國寶知難而退，定係消極地等機會，就得佢自己至知嘞。
身為建制派嘅星爺，既然敢跳出嚟話自己想選，睇嚟佢都覺李國寶好大機會唔選。面對一個工作表現有目共睹地差嘅議員，金融界都可以咁客氣，可能真係香港獨特之處。