政情：釋智慧講佛偈撐政府
出家人四大皆空，不過寶蓮禪寺住持釋智慧係入世和尚，點可以唔理政治？喺啱啱曲終人散嘅特首選舉，作為宗教界選委，釋大師提名咗唐英年，選舉過咗一個月，佢尋日就喺浴佛節活動表明心迹話撐政府，但又拋低一句，話如果政府唔支持寶蓮寺，就係傻嘅。佛偈講到呢度，究竟係乜意思，唔通要有悟性嘅人至可以明白？
其實寶蓮禪寺同政府過去真係有好大衝突，當年寶蓮寺計劃興建萬佛寶殿，政府要求寺方補地價五千萬元，結果氣得釋大師要封山七日，後來有傳政府將地價減到一千二百萬元，寺方先同政府就土地擁有權同管理權達成共識。其實煩惱嘅根源，好多時都離唔開個錢字。
政府計劃興建昂坪360又有衝突，當時出家人不滿纜車破壞寶蓮寺風水，兼干擾佛門清淨地，釋大師尋日就話，今時今日嘅候任特首梁振英（CY），原來都曾經出手調解，原來佢同CY，已經相識多年。
已邀請CY到訪寶蓮寺
四月廿八日佛誕在即，寶蓮寺尋日率先舉行浴佛節典禮，廣邀城中名人浴佛、食齋，洗淨六根。氣色唔錯嘅釋大師，主禮後不忘講吓新發展，最新消息係，當年產生事端嘅萬佛寶殿，工程將要由原定今年底完成延期至明年底。起得慢咗，大師無講原因。只解釋話，寶蓮寺唔少地方要進行修葺、翻新，明年底將一併完工，以全新面貌示人。即係話，期待一睹二億元打造「萬佛殿」嘅善信，要再坐一會嘞。
眨吓眼，萬佛殿修成正果，睇住快將落成嘅大殿，釋大師難免感觸，對舊事輕描淡寫之餘，新官上場，釋大師仲率先「大和解」，已經邀請CY到訪寶蓮寺，但一切要等對方正式上任再算嘞。
釋大師喺政界長袖善舞，喺宗教界，的確少見。佢嘅去留問題，一度成為焦點。明年將八十歲嘅釋智慧，坦言身體唔及以前，講經重任，亦要由得力弟子分擔。幾時退位讓賢？大師已遁入化境：「（寶蓮寺）董事局想我留低，我咪留低，佢哋想我退下，我咪退下囉。」如此「識時務」，善哉善哉也。