主婦街市跌傷領匯靠害
公屋居民每日必經之地竟暗藏危機，行人通道驟變傷人陷阱！青衣街市落成至今已逾三十五年，地磚因嚴重磨蝕而失去防滑功能，領匯卻一直未有更換，早前便有長者「被跣」受傷並需入院縫針。事發後領匯進行的跟進維修工程仍然「做啲唔做啲」，關注團體直斥領匯管理不善，嚴重漠視居民安全。
年屆六十六歲的林女士今年二月中旬途經青衣街市，當走在行人通道上時，冷不防地面又濕又滑，一下失卻重心即向後摔倒，事後須由救護車送院治理，經檢查後左手腕證實骨折，頭、腰亦感到疼痛。「呢次真係跣到攤攤腰，領匯簡直係靠害，啲防滑磚爛咗又唔整，是但補番水泥就算，搞到個地下咁滑！」林指三月中覆診時原定可拆石膏，惟因骨折處尚未愈合，需再次「打石膏」，預計稍後才可拆除。
林指領匯事發後雖即時「補鑊」，僅在跣人位置重鋪16塊防滑磚，「爛咗嘅地方都鋪唔晒，就咁喺面頭鋪塊地氈就算，鋪啲唔鋪啲，領匯真係好求其！」除事發地點外，街市內尚有其他防滑磚損毀，亦未見維修。
設施殘舊應及早維修
「設施損毀就要維修，連咁基本嘅門面工夫領匯都唔願做，好明顯係完全唔重視安全！」公屋聯會主席王坤直斥領匯只着眼於增加轄下商場、街市租金收益，不少損毀設施卻未獲重視，令市民使用權益直接受損，「其實好多舊街市嘅設施都好殘舊，領匯唔應該等到有事發生先去維修，應該要主動分階段全面維修！」王坤認為領匯應盡快檢查及維修轄下損毀設施，加強巡查及管理，讓市民可在安全環境下購物。
領匯發言人指每日均有青衣街市駐場主任及保安員定時巡邏，確保設施及場內運作正常。管理處在事前亦按需要重鋪水泥及防滑磚，近期亦已在積水較多位置加設防滑地氈，場內並擺「小心地滑」告示。至於上述個案已轉介保險公司跟進。對於事後維修工程被指過分草率及漠視途人安全一事，發言人則未有回應。
記者：徐少琴、陳倩儀