國際權威民調分析全球痛苦指數，結果得出香港痛苦指數高達百分之十四，衰過民怨沸騰嘅中國以及飽受九級地震和核洩漏嘅日本。七個港人有一個痛苦，政府「窮得只剩下錢」，何以港人不但唔感到幸福，反之更是望風懷遠、憂心痛苦？呢個問題確係值得反思！
無可否認，快樂係一種心境。有一句名言話：「悲觀主義者認為所有女人都是壞女人，樂觀主義者希望這是真的。」香港人近數月來嘅心境奇差，點會係樂觀主義者啊！睇嘢必定灰蒙蒙，好明顯同本港出了一個貪曾有莫大關係。連公務員事務局局長俞宗怡都話，該局只有權懲處公務員，無權規管貪曾等問責官員，言辭間不齒貪曾醜行。畢竟是貪曾一手摧毀公僕「廉潔奉公」嘅金漆招牌，佢哋唔痛心疾首就假咯！
老朽有個公僕朋友，有個大好家庭，做事勤快，好衰唔衰，就係太好心借咗萬多元給同部門嘅同事，唔覺意跌落《公務員守則》陷阱，結果惹來調查，更要接警告信，今後升職無望。你話喇，貪曾貪遍省港澳，嘴角滴油，華衣甩掉，煲呔斜落，仲厚臉皮說是時代變了，公眾期望高了，一於歎到最後，瘋狂外訪，懶理香港深層次矛盾持續潛行惡化！
看官，貪曾把公務員嘅廉潔守則拋到外太空就得，而公僕小小行為失當、偏差就面臨紀律懲處，考績畫花，前途盡毀。咁嘅雙重標準，淨係十七萬公僕都唔會快樂啦！