政情：轉唔切國籍 司馬文焗棄選
公民黨舊年喺區議會選舉大敗，原本諗住可以出戰選超級區議會議席嘅人選全軍覆沒。公文袋左度右度，惟有出奇招，搵本身係荷蘭人嘅南區區議員司馬文出征，希望可以爭取番啲外籍選民選票，可惜未選已甩轆。司馬文因未能趕及喺選舉前搞清楚國籍問題，被迫放棄參選。該黨計劃改派知名度更低嘅荃灣區議員陳琬琛參選，當選機會微乎其微。
法律規定超級區會候任人唔可以擁有外國護照，司馬文舊年十一月當選區議員，已下定決心放棄荷蘭籍參選超級區會，但前提係要取得中國籍，以免淪為無國籍人士。入境處今年一月開始跟進司馬文嘅申請，到上周五通知佢最快要年尾先批到，令佢被迫棄選。公文袋自己甩轆就賴人，質疑入境處嘅做法涉及政治因素。但據熟悉有關問題嘅人士表示，近年多咗好多南亞裔人士申請中國籍，司馬文要排一年時間絕對唔奇，應該唔涉及政治。