政情：大輝戰直選 復仇先輸一仗
特首選舉之後，「大和解」排山倒海而來，好多原挺唐人士都口徑一致咁話，佢哋同候任特首梁振英（CY）根本「無打過交」，所以毋須和解或擔心秋後算帳。自特首選舉後一直避見CY嘅唐英年「家臣」林大輝，尋日終於同其他四位立法會「散人」同CY會面，會後坦言建制派喺選舉後存有矛盾係事實，佢亦的確有擔心過秋後算帳呢個問題，但相信最後唔會發生喎。
大輝語重心長咁話，若真係有人搵佢算帳，「我相信我會有最大嘅智慧、最大嘅勇氣去面對同應對！」大輝點解講到咁悲呢？或同佢密謀上演「家臣復仇記」失敗有關。
據聞上屆循廠商會功能界別出選嘅大輝，早幾日向「有票無人兼無財」嘅沙田地區政團公民力量（公記）招手，希望公記支持佢參選新界東直選，仲承諾會「帶錢入黨」，擺明想借轉戰直選為唐營挽回聲勢。可惜公記一早已同挺梁嘅沙田區議員龐愛蘭「結緣」，前晚仲正式通過龐愛蘭加入代表佢哋參選新界東添，令唐營再輸多鋪畀梁營。