政情：金勞詹爆粗 無視議事規則
立法會議事堂有議事規則，粗言穢語係唔可以亂講嘅。但金融服務界議員詹培忠（金勞詹），尋日喺立法會講講吓「長毛」梁國雄被罷免議員資格動議時，無端端將矛頭指向公民黨，話佢哋維護長毛係私利，仲突然爆粗話：「公民黨選舉實輸到×街！」加上佢先後疑似爆粗咗幾次，完全視議事規則如無物。
但最奇怪係立法會主席曾鈺成尋日好鬆手，只係要求金勞詹收回有關說話，但金勞詹唔知做乜，竟然躁火回敬一句：「驚咩呀！唔講都講咗啦！」最離譜嘅係曾鈺成又由得佢，無按議事規則趕佢出會議廳，完全當無事發生，相比過往對待泛民主派議員，確係厚此薄彼。
其實尋晚金勞詹爆粗唔止一次，成晚講嘢都扯晒火，有次佢無喇喇指住李卓人鬧，話「唔畀講嘢拍枱呀！」又話：「唔鍾意就行出去一齊打鳩（交）囉！」行為極之無禮。唔知係咪佢近期熱氣得滯，定係去賭場輸咗錢呢？抑或係佢支持嘅唐英年做唔到特首呢？不過，奉勸佢一句，咁扯火對身體無益o架！