中環出更：彭徐美雲帶女童軍玩轉絲路
女童軍香港總監彭徐美雲（Josephine）上任眨眼間快將一年，任務一浪接一浪，嚟緊暑假，佢將帶三百位女童軍坐火車遠征絲綢之路。絲路一向係熱門旅遊路線，撞正暑假，火車同飛機位相當緊張，為保證有位坐，女童軍今次將包下一架火車專列，八月初由香港出發往北京，再啟程去西安、甘肅同新疆，實行玩轉絲路。
拉埋老公囝囝隨團
今次隊伍嘅團友組合多元化，除咗二百位香港女童軍及一百位亞太區女童軍參加外，仲有由名人組成嘅VIP團，加埋近五百位內地青年，老中青組合都齊晒，相信會擦出唔少火花。做得團長，Josephine絕非絲路初哥，幾年前曾以廣州市政協身份到絲路考察，可謂熟晒地頭。
今次重遊舊地，Josephine唔想行程走馬看花，將安排女童軍深入農村家庭，感受鄉村生活，仲會一嘗農村飯滋味。咁好玩，Josephine一於拉埋老公彭曉明及囝囝彭穎生隨團，做佢得力助手喎。
卓妮