中環出更：肥亨孖呂志和歎茶傾密偈
前中策集團主席馬時亨（肥亨）自從轉做中策高級顧問後，陪家人同朋友嘅時間都多咗，一得閒就出門散吓心，平日就約朋友去吓high tea。卓妮早幾日行經中環某酒店，就見到肥亨同嘉華國際主席呂志和一齊歎茶，仲密斟足足成個鐘，似乎好好傾咁喎，唔通佢想過檔幫呂志和打工？
今個星期一下午四點半鐘左右，卓妮喺太子大廈見到肥亨，佢邊行邊講電話，之後行入酒店一樓餐廳。原來呂志和一早就喺餐廳開定枱等佢，兩人一見面即熱情打招呼，仲雞啄唔斷添，表現得相當老友。佢哋傾咗一個鐘頭先至埋單離開，但繼續邊行邊傾，講極都唔完。落樓梯嘅時候，肥亨不忘攙扶呂志和一把，認真細心。
卓妮上前同兩人打招呼，問肥亨係咪想跳槽？佢笑笑口話：「和哥公司大把猛將，使乜搵我去做吖！」和哥唔使幫，咁會唔會幫下屆特首梁振英呢？肥亨就話肯定唔會，而身邊嘅呂志和即刻插嘴話：「千祈唔好呀，佢入返政府，邊個陪我打波（高爾夫球）呀？」原來肥亨咁重要嘅。
肥亨自爆係觀瀾湖常客
肥亨話，其實佢依家仲係好忙，經常飛嚟飛去開會，有時間都留番畀自己休息吓，打吓高球，佢仲話自己係觀瀾湖高球會嘅常客，經常去捧場。唔知觀瀾湖主席朱鼎健聽到，會唔會計肥亨平啲，或者考慮叫佢做觀瀾湖代言人呢？最後，肥亨目送呂志和離開後，自己先至登上七人座駕離開。
卓妮