回歸以來，港府已透過各項採訪限制逐漸蠶食新聞自由。
去年以「黑影論」揚名的警務處處長曾偉雄，被記者一再追問為何設立採訪區，佢反指是應記者要求。唉！如果咁都得，即係老屈孫悟空哀求如來佛祖一定要加個金箍咒喺佢頭上！
「黑影大師」其後更發老脾，話畀記者聽：「唔鍾意，有權選擇唔喺度！」說罷即轉身閃人，懶理傳媒。嘩！黑影大師變身鷹哥，原來可以cool成咁！講真，比起國內啲暴發戶，鷹哥又算幾有品，老朽早前睇國內雜誌，見到一個個案，話說廣東省政協常委、深圳市怡景中心城董事長劉偉宏，拳打連續報道其「涉嫌違規賣舖」的《深圳商報》女記者秦興梅胸部，並大叫：「我打你怎麼了？我這輩子就跟你在一起了！」
嗱嗱嗱！黑影一哥都係間接話記者個鏡頭撞鬼啫，冇聲大夾惡話要卡你一輩子，跟你在一起啊！所以話鷹哥算有品，香港總算仲有啲王法！
之不過，港府打壓新聞自由，就無論點講都唔啱！中國傳統社會，理性從未佔據過上風，對智慧的推崇，更向來不曾凝聚成廟堂或江湖嘅共識。
然而，時代畢竟在進步，香港人追求民主、自由之心從來不死，傳媒影響力人所共知，尤其本報「只為蒼生說人話」的作風，一向贏得廣大讀者的愛戴！港府打壓新聞自由，即係封殺讀者知情權，同我廣大讀者作對，一定冇好結果！