國際權威機構蓋洛普分析全球數據，顯示香港嘅痛苦指數高達百分之十四，七個香港人就有一個痛苦，比起經歷大地震蹂躪嘅日本竟然仲慘情。大家見到咁嘅調查結果，有乜嘢感想冇呢？功夫茶嘅感想就係，如果唔係特區政府，香港唔會變咗「特區正苦」！
嗱，示威遊行係民眾痛苦嘅表現，而阻撓示威遊行甚至扼殺新聞自由，就會令人苦上加苦。好似尋日咁，支聯會舉行「毋忘六四長跑」，悼念六四事件二十三周年，長跑終點係中聯辦，你估警方點樣處理吖嗱？可惡咯，警方喺中聯辦門外架起鐵馬，正門對出花槽設立警方行動區，只准四間電視台入內近距離採訪，其他傳媒被安排到鬼死咁遠嘅所謂記者區工作。咁唔公平嘅處理手法，當然引起記者強烈不滿。幾經交涉之後，警方先至讓步，安排所有在場記者進入警方行動區採訪。攝影記者協會就批評嘞，警方原先嘅安排係妨礙新聞採訪自由。
類似事件其實發生過不知幾多次，警方為咗保護國家政要，示威者唔係強行抬走就係變相禁錮，而負責採訪嘅記者呢，警務處處長禿鷹先生曾偉雄形容為「黑影掠過」，警方反應係「伸手擋格」，一格之下隻手卡住攝影機。講來講去，咪又係妨礙新聞採訪自由囉。
計功夫茶話齋，特區政府簡直衰過港英舊時，以前英國佬打骰都冇咁兇神惡煞啦，不但對記者客客氣氣，更加唔會動不動就向示威者「顏射」，兜口兜面以胡椒噴霧洗面，有時仲係集中火力七個噴一個。因乜事幹回歸之後香港警察愈來愈似「港產公安」？點解要溫水煮蛙慢性謀殺新聞自由？講到尾，靚仔靚女唔怕出鏡，只有醜人恐懼曝光，遮擋鏡頭嘅用意係為自己遮醜。
講到醜人，第一個想擋鏡頭嘅肯定係「痛心特首」曾蔭權，以免接受富豪款待嘅貪腐行為大白於天下。好彩東方報業集團不畏強權，堅定不移為民喉舌發掘真相，連環獨家報道揭破貪曾嘴臉。好嘞，功夫茶問問大家，如果新聞自由真係被殺到斷氣，受害嘅會係邊個呢？答案顯而易見，貪官橫行無忌，市民雞毛鴨血，香港必然邁向死亡！
香港話就話三權分立，之但係貪曾醜聞話畀大家知，行政、立法同司法三權都吹佢唔脹，更加有不知廉恥嘅擦鞋仔保駕護航，如果唔係第四權嘅正義傳媒發揮監察作用，香港早就淪為貪官俱樂部！
所以啫，唔想貪官當道，唔想香港死亡，新聞自由不得不堅決捍衞。所有姓曾嘅高官聽清楚，邊個謀殺新聞自由第四權，邊個就係遺臭萬年王八蛋！