政情：陳甘美華hea足九年
梁振英當選行政長官，唔少市民都期望可以為烏煙瘴氣嘅特區政府帶來新氣象，雖然未正式上任，但市民嘅訴求已經接踵而來。我哋最近收到一封投訴信，內容係話現時民政事務總署庸官當道，唔少仕途行人止步嘅政務主任入咗呢個部門，有入冇出，一做多年，有違一般政務主任經常調任嘅安排。由於投訴信行文有條不紊，加上對部門人事安排如數家珍，所以有理由相信，係民政署內部唔妥被庸官領導嘅公務員所寫。
寄CY及傳媒 盼收拾殘局
呢封寫畀候任行政長官辦公室嘅投訴信，對象當然係CY啦，投訴人同時將呢封信畀咗傳媒，好明顯係想引起社會關注，等CY幫手解決煲呔曾在任七年帶來嘅殘局，收拾民政署呢個爛攤子。
封信話，民政署庸官俯拾皆是，好似某個民政事務專員咁，一九七九年已加入政府，喺依家呢個官階已經廿四年，一直冇得升，令人質疑佢能力到底有幾好。
至於民政事務專員嘅上司、民政事務總署署長陳甘美華亦唔好得幾多。投訴人話，陳太連續做咗民政署署長超過九年，同上面個例子一樣，冇得升、冇得調，同其他三、四年就一調嘅政務主任相距甚遠，投訴人質疑，點解佢九年唔使調職呢？會唔會係因為能力欠奉，冇其他政務局肯收留佢呢？呢個謎，相信只有政府可以解答。
坦白講，如果話民政事務署之中冇既年輕又有魄力嘅公務員，似乎又確係唔太公平，其中好似北區陳羿、屯門張國財、元朗楊德強，以及深水埗莫君虞等幾位民政事務專員咁，個個年輕有為，可成大器，只不過現時要喺煲呔曾麾下服務，本身幾叻都冇用，令人搖頭嘆息。
民政署嘅最重要功能，其實就係幫政府為市民把脈，掌握民意，煲呔曾將陳甘美華擺喺咁重要嘅民政事務總署署長個位，畀佢hea足九年，而政府又唔知、唔理市民嘅生活係幾咁水深火熱，其實真係互為因果囉。