中環出更：周松崗掌港交所信心爆棚
最近有傳前港鐵行政總裁周松崗獲政府「欽點」做香港交易所主席，但由於佢缺乏金融經驗，唔少人都對佢意見多多。尋日卓妮喺跑馬地馬場見到周松崗，問佢點睇呢件事，佢就好有信心話自己可以勝任，仲硬銷自己優點添！
硬銷自己非門外漢
周松崗話，佢都聽聞外界對自己嘅聲音，亦承認自己較少接觸金銀證券交易，但佢過去曾於銀行、保險界工作，又曾任工商業行政總裁十五年，對集資及投資知識可以講係瞭如指掌，並非門外漢。
周松崗解釋，港交所嘅真正作用，係給予投資者同集資者一個資金交流嘅平台，以及畀生意人管理風險嘅平台。呢啲技術層面嘅運作，係由港交所管理層負責，而董事局則負責宏觀嘅發展方向。所以佢話，就算對證券交易生疏，做主席亦無大礙㗎！
讀化學出身嘅周松崗稱，喺職場生涯三十八年中，如果計埋港交所在內，做過十個唔同類型嘅工種，包括化工、汽車、航空、運輸、地產、礦產等，佢笑言，自己入港鐵之前都係全無經驗，咪一樣勝任得到，對於有人反對佢出任港交所主席，佢話：「你睇我做成點先啦！」佢好似做硬呢個位喎。
卓妮