大家都玩過層層疊啦，一堆木頭如果抽走下面幾塊，隨時砰嘭一嘢冧晒。現實世界都曾經有過咁慘烈嘅情況，土瓜灣馬頭圍道死人冧樓，出事嘅唐樓就係懷疑支柱受到破壞，然後成幢樓轟轟隆隆土崩瓦解。
因乜解究重提死人冧樓嘅舊事呢？哦，冇嘅，提醒一下地政署啫，驚佢哋唔知一項連小學生都明白嘅物理定律：支柱不可破壞，否則乜都冧晒。
不如再講得詳細少少啦，畢竟功夫茶對於本地官僚嘅智商愈來愈冇信心。即係咁，一條橋下面用作支撐嘅橋墩係唔可以受到破壞o架，萬一有乜損毀好大可能造成死人冧橋嘅大災難。好衰唔衰，香港好多橋底為咗善用空間，係會用作停車場或者貨櫃場嘅。你知啦，大型貨櫃車簡直就係地上最強嘅超級巨無霸，一個唔覺意撞埋橋墩，後果可大可小吖嘛。
呢嗱嗱嗱，葵青區由於有好多貨櫃碼頭以及物流公司，所以貨櫃車嘅泊位需求極大，於是政府就以短期租約形式，將部分高架道路同高架鐵路嘅橋底出租，畀私人機構經營停車場。弊就弊在停車場經營者未必會按規定做好橋墩保護工作。以港鐵嘅高架鐵路為例，租約通常規定橋墩周圍設立一米半高、兩米闊嘅固定石屎防撞欄，高架橋垂直向下六米範圍不可泊車、存放貨物以及貨櫃等等。之不過問題係，停車場經營者睬你都傻，而負責監管嘅地政署又闊佬懶理。
工業安全關注組發現，葵青區至少十四個停車場有不同程度嘅違反租約情況，包括僅僅以活動石壆頂替固定石屎作為防撞裝置。你知啦，活動石壆嘅防撞作用有限，若然貨櫃車以雷霆萬鈞之勢撞過去，橋墩照樣損毀o架咋！
講到呢度，大家可能仲未想像得到死人冧橋會係一幅幾咁恐怖嘅畫面，不如咁嘞，功夫茶介紹大家睇一套叫做《死神5來了》嘅電影，其中一幕就係有一條橋冧到車毀人亡腸穿肚爛，唔係跌死，就係撞死，再唔係咯喎，半身被削開而死。喂，睇戲就話過癮啫，你都唔想咁恐怖嘅電影情節成為現實吖。
所以話啫，真係有必要提醒地政署o架，好心加強巡查橋底停車場嘅經營情況啦，千祈唔好容許橋墩處於毫無保護嘅脆弱狀態。表面上橋墩可能冇穿冇爛，實際上有機會因為被撞過而潛伏危機。
如果地政署官僚仍然愛理不理懶懶閒，咁就有必要恭請未來特首梁振英以「既狼且辣」嘅作風出手整頓。冇錯，寄希望於未來特首而唔係現任特首，因為貪腐醜聞纏身嘅曾蔭權已經做咗關人忍事嘅忍者龜。
總而言之，官僚疏於護橋墩，小心冧橋又死人！