政情：大和解飯局忽然墟冚
梁振英（CY）當選特首後，一批「深唐」嘅政界人物在明在暗都表現得好唔高興，為免建制派間關係持續惡化，民建聯主席譚耀宗主動搞場「大和解」飯局，今晚就會喺中環中華總商會舉行。原本飯局反應麻麻哋，但本周一工聯會訪京期間，港澳辦主任王光亞就開到聲要大家大和解後，參加飯局人數即時激增，認真神奇，睇嚟民建聯呢個和事老無號召力兼瘀爆。
今晚個大和解飯局，對象係立法會內嘅建制派議員，最初只得小貓三幾隻報名，唔少「深唐」嘅立法會議員都拒絕出席，有啲仲講到明同CY無嘢好講、無嘢要傾，態度之強硬令人為之側目，但呢類人畢竟只屬少數，唔少人都抱觀望態度，總之就係點都唔肯講實係咪參加，留番條後路畀自己。不過，「大和解」言論一出，粗略估計今晚最少有三分二建制派議員應邀出席。
自由黨搵方剛捱義氣
其餘三分一唔出席嘅議員各有理由，先講吓同CY反晒面嘅自由黨，主席劉健儀解釋，因為有親友喺醫院，所以抽唔到時間去飯局。副主席張宇人就聲稱事忙所以唔去，成個黨三個立法會議員，只得另一位副主席方剛肯捱義氣出席。除咗自由黨外，唐英年「家臣」林大輝出席機會亦唔高，尋日我哋打去查詢，佢以講緊電話為由匆匆掛線。
除咗一般嘅理由外，建制派議員唔應邀都仲有其他原因嘅，好似旅遊界議員謝偉俊，就斬釘截鐵話今晚一定唔出席，因為佢要繼續喺專責委員會查CY喺西九比賽事件中涉嫌漏報利益單嘢，為咗避嫌，所以一定唔去喎。不過，亦有「深唐」議員響應大和解，好似總商會及工業總會議員林健鋒同梁君彥咁，佢哋挺唐挺到出晒面，但今晚都一樣會出席，話想聽聽CY有乜嘢講喎。
計埋主人家民建聯及一向支持CY嘅工聯會，出席飯局嘅建制派議員已經去到廿幾個，成績算係唔錯喇。點都好啦，既然中央已經出到聲要大和解咯，建制派議員即使幾唔願意都要歸邊，呢啲咪就係建制派議員嘅功用囉！