政情：蔡敏思媽媽 驚喜慶生辰
潮州人家庭觀念重，好似身為「潮州冷」嘅香港青年聯會常務會董蔡敏思（Mence）就相當孝順，上周六晚就約埋姊弟妹同媽咪Romi慶祝生日，揀咗佢細佬小良有份投資嘅火滾肥牛海鮮湯鍋專門店開餐。蔡太事前被蒙在鼓裏，以為只係食餐便飯，點知現場有七、八十個親戚朋友到賀，生日賀禮及鮮花收到唔停手，既驚喜又窩心。
Mence龍蝦湯底當水飲
當晚高朋滿座，小良更加要出盡法寶，推介鎮店美食畀至親好友，包括鮮甜美味嘅鱆紅魚刺身、足料惹味嘅波士頓龍蝦湯鍋等。Mence笑稱自己係「龍蝦精」，無龍蝦不歡，當晚仲將龍蝦湯底當水飲，大呼暢快。佢話，自從年幾前細佬開火鍋店之後，就當正係私人飯堂，有時一連幾晚都喺度開飯添！
當晚Mence趁機約埋約廿位中學同學聚餐，事關有位無聯絡廿年嘅同學由加拿大返港，大家一邊歎火鍋，一邊回憶那些年，傾得好盡興。Mence老公謙哥及囡囡Shanice亦喺度，今年九歲嘅Shanice話，復活節假期媽咪帶佢去屯門黃金海岸住咗兩日，雖然天氣涼冇得游水，但係期間行沙灘、玩搵復活蛋嘅尋寶遊戲，一樣咁開心。