政情：中環出更：肥亨遊關島 打足七日高球
唔少人都趁住之前復活節長假出遠門充電，剛剛辭任中策集團主席嘅前商務及經濟發展局局長馬時亨（肥亨），就同太太王培琪及一班政商界「波友」飛去關島同塞班島，打足七日高爾夫球，歎到盡。
肥亨話，自己係首次去關島，驚覺當地風景靚、空氣好，日日盡享陽光與藍天白雲，不知幾寫意。至於佢大女馬露明（Christine）同細女馬露玲（Andrea）就無隨行，肥亨笑笑口話，女大女世界喇，唔通仲咁黐家咩！
潘逸陽送贈內蒙古名畫
肥亨透露，兩個囡囡喺復活節分別去咗唔同地方，已為人婦嘅Christine同老公度第二次蜜月，漫遊法國及意大利八日。而Andrea就去咗青藏高原東北部嘅青海，為教會傳福音。肥亨當初都好擔心Andrea去到會患高山症，好彩Andrea安全歸來。
雖然肥亨由中策集團主席轉為高級顧問，但佢依然好想為集團服務。佢話，日前內蒙古自治區政府來港招商，佢都有參與其中。咁啱佢同自治區常務副主席潘逸陽係多年老友，於是一盡地主之誼，與現任中策集團主席柯清輝齊齊宴請內地賓客品嘗廣東菜。當晚潘逸陽仲送咗一幅內蒙古名畫家嘅佳作畀肥亨，令佢受寵若驚。
卓妮