嘩嘩嘩嘩！點解會咁o架？行街啫，居然無端端冇咗條命，香港幾時變得咁鬼死恐怖o架？
事發於西營盤皇后大道西近東邊街，尋日中午時分有一架拖車，拖住一架重型吊臂貨車，上斜路懷疑馬力不足停低，司機落車視察嘅時候，拖架突然脫離，吊臂貨車溜後。一溜後就大煲大鑊夾大劑嘞，先撞倒一名中年男途人，然後車尾衝入一間位於皇后大道西嘅雜貨店，一名路經嘅婆婆被撞至返魂無術，另外有一名大叔受傷。簡單咁講，一宗唔應該發生嘅車禍，導致無辜小市民一死兩傷。
車禍點解話唔應該發生呢？首先，政府宣傳片都有講啦，路上零意外，香港人人愛，奪命車禍一宗都嫌多。其次，事發現場嘅交通標誌寫到明，超過十米長嘅車輛不能進入東邊街，拖車同重型吊臂貨車根本唔應該出現，更加唔應該喺斜路失驚無神「甩拖」。所以話啫，婆婆真係死得好冤枉。
功夫茶想問問運輸署，既然超過十米長嘅車輛不能進入東邊街，署方有冇做好預防措施呀？有冇改善安全設計呀？譬如話，交通標誌若然唔夠顯眼，司機或者會發雞盲「誤闖禁地」，咁咪危險囉。
唉，話時話，今時今日要求運輸署以至於整個特區政府「做好呢份工」，簡直係緣木求魚。你知啦，煲呔曾最熱衷於「曾商勾結」，一味傍實富豪貪威識食，七年施政一塌糊塗。更加閉翳嘅係，呢一個貪曾將於六月三十日夠鐘執包袱落台，試問由佢領導嘅夕陽政府又點會喺臨收工之前積極投入為市民服務？曾蔭權唔喺禮賓府織冷衫打發時間都偷笑咯！
正所謂，上樑不正下樑歪，弱將手下無強兵，貪曾率領嘅司長局長基本上冇一個似樣，尤其係有權過問七百萬市民「生老病死」嘅食衞局局長周一嶽，名副其實令人求生不得、求死不能。嗱，好似屬於周一鑊管轄範圍嘅骨灰龕位政策吖，既然陰宅嚴重缺貨，你想死都唔死得啦！
講到求生不得，例子不勝枚舉，淨係對於內地黑心食品把關粗疏，已經容易害到老百姓小命不保。最近深圳寶安區揭發環境衞生惡劣嘅黑工場，利用可致癌嘅工業用添加劑、棄置用油同變質原料製成「毒河粉」。功夫茶請教周局長，敢唔敢保證毒河粉冇流入香港呀？食衞局有冇疏於職守睇漏眼呀？
不如咁講啦，冇人想香港繼續施政拙劣車毀人亡，咁就麻煩下屆政府盡快組班做好充足準備，一開工就將曾蔭權同周一嶽袞袞諸公留低嘅爛攤子撥亂反正。喂，七月一日送瘟神好快到o架咋，千祈唔好學似嗰架奪命拖車咁甩拖！