市區重建局着手重建觀塘舊區，觀塘區議會幫手推動重建落心落力，但居然被市建局打完齋唔要和尚。話說市建局收咗觀塘政府合署棟樓後，觀塘區議會就要搬去對面嘅創紀之城，但市建局只係租咗個地方畀區議會開會，並無租埋車位畀啲區議員，搞到有車一族嘅議員怨聲載道。
原先觀塘區議會上月就搬竇，但因為有技術問題而推遲到下個月，話就話市建局出錢租番個新場畀區議會，但市建局聲稱條例問題唔可以租埋車位畀區議員喎，聽聞只係租咗一千零一個車位畀觀塘民政事務專員獨享，竟然連觀塘區會主席陳振彬都無份。
大家都知區議會會議好多時都口水多過茶，一個唔覺意開四、五個鐘只係等閒事，要班區議員停泊時租車位，開一次會就唔見百幾蚊，好難怪佢哋嘈到拆天，據講依家雙方仲喺度拗緊數o架，唔知點收科。