政情:陳嘉華瘦身增形象分

經濟動力近期密密喺地區搵樁腳,最近就搵咗「年輕公職王」豪華集團太子爺陳嘉華加入,佢同經濟動力核心人物林健鋒一樣都係叫Jeffrey,可謂同聲同氣。

原來Jeffrey打算備戰下屆區議會選舉,由於經營飲食生意,加上有四十幾個公職喺身,應酬多自然搞到身形膨脹,於是有前輩就勸佢從政前先瘦身,話瘦人係代表勤力同做到嘢喎!

Jeffrey於是的起心肝落實減肥大計,日飲四包瘦身飲品,每周踩三次單車,三個月內輕鬆搣甩三十磅,行步路都輕盈晒,啲西裝仲要全部重新訂造,但離理想體重仲有二十磅。

不過,減肥仲有個好重要嘅原因,就係佢今年初遇上心儀對象,雙方仍然喺發展階段,佢希望修身後,畀到對方更好嘅印象喎,咁有誠意,相信女方一定會好感動啫!

講番公司發展,已掌管二十間酒樓嘅Jeffrey,今年會嘗試經營火鍋店,而佢一家上下都好鍾意打邊爐,以後就多個私竇宴親朋喇!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報