政情：劉健儀自殺式落港島？
新民黨主席葉劉淑儀盛傳會重返政府，意味佢喺港島區嘅立法會議席將變為建制派兵家必爭之地，其中本身循航運交通界功能界別進身立法會嘅自由黨主席劉健儀（Miriam），尋日表態話積極考慮轉戰港島區直選，又話如果黨主席唔帶個黨走直選路線會畀人恥笑喎。
自由黨一直有意染指較多中產選民嘅港島區，但一直以來因「蜀中無大將」，所以只聞樓梯響，結果依家落實由Miriam挺身而出，望喺港島取得零的突破。不過，能否成功出選又係另一回事，問佢有無被勸退時，Miriam起初笑而不答，之後就語帶雙關話預咗做烈士，仲話如果自己要戀棧權位就留番喺航運交通界喎。
如果Miriam真係棄選航運交通界，相信會掀起新一輪惡鬥，因為據聞早年由自由黨過檔經濟動力嘅屯門委任區議員羅煌楓，以及沙田區議會副主席彭長緯都對呢個議席虎視眈眈，如果Miriam真係自殺式衝落港島參選，最終會否兩頭唔到岸，呢個就要拭目以待喇！