中環出更：1500貧戶成員 暢遊海洋公園
香港青年聯會及旗下賢慧社一眾型仔靚女，尋日齊齊換上輕裝、戴上黑超玩轉海洋公園，事關由佢哋主辦嘅第三屆「青聯賢慧愛家日」，招待咗一千五百個來自貧困家庭嘅小童及家長，浩浩蕩蕩一齊暢遊海洋公園。
賢慧社主席羅詠詩（Anthea）話，今次特別要多謝合和實業太子爺胡文新、香港青聯交流基金主席陳寧寧及「十分關愛基金」等機構贊助支持，仲有二百幾位義工幫手，先至可以令貧童得以享受平時難以負擔嘅遊玩經歷，佢希望活動可以延續下去。
林玉茵連趕兩場
咁有意義嘅活動，青聯主席葉振都又點可以唔現身吖，同場仲有一連趕兩場嘅青聯賢慧社聯席副主席林玉茵（Maya）。Maya去完愛家日活動後，隨即卸去T恤，換上一襲Herve Leger，飛抵銅鑼灣保良局總壇，為媽咪梁寶珠任新主席打氣，真係乖女。