中環出更：保良一姐就職 汪明荃撐場
慈善團體輪流換屆，繼東華三院後，尋日又輪到保良局，梁寶珠（Jacqueline）接棒做新一屆主席。寶珠姐係粵劇發燒友，作為好友嘅八和會館主席汪明荃都賞面撐場。
Jacqueline上任後大計多多，酷愛粵劇嘅佢，上任頭炮即粉墨登場，日前喺文化中心舉行粵曲慈善夜，成功籌得逾一百六十萬元。佢又計劃同「八和」合作，喺保良局屬下中學搞「粵劇課程試驗計劃」，薪火相傳。
鄭錦鐘榮升「首副」
「鯊魚女」陳細潔（Abbie）亦升呢做副主席，去年佢喺保良董事局中，排行第八，有「保良八妹」之稱，眨眼又一年，佢升呢做第五副主席，新外號係「五副」。至於副主席鄭錦鐘都升班做第一副主席，Abbie家姐劉陳小寶幽默笑佢變咗「首富」：「你依家做咗『首（席）副（主席）』，身價唔同晒喇。」認真風趣。
鐘錶界陳正欣亦冧莊做總理，佢太太Angel同囡囡Latisha齊到賀，Angel孭住一個鑲滿閃石嘅MCM潮爆手袋，原來個袋係贊助嘅禮物，認真夠面子。尋日就職禮仲見到總理之一嘅「快勞夾大王」杜振源、莎莎國際老闆郭少明夫婦及女婿陳振邦等，場面墟冚。
卓妮