綠色先鋒：環保變飾龍

「見到一塊半塊布碎可能無咩嘢，但見到成個辦房都係嗰陣，好自然就會覺得應該要將佢哋物盡其用。」Kenny在訪問一開始便明言，時裝界並不環保。「每次有fashion show就即係話會有好多布頭布尾要拎去掉。」Kenny指，每當有時裝展或新系列要推出市面，事前必定會訂大量布料「造辦」，製作過程通常會剩下很多布碎，甚至是一疋疋訂了卻發現不適用的布疋也會被棄置不用。「作為設計師，我問自己點可以環保啲。」

思前想後，Kenny的答案是領飾。他認為，用棄置布碎造領飾不只是轉廢為用的環保構思，其背後的意義其實遠遠超於循環再用。「我做領飾最大原因係佢可以令着衫嘅人發揮無限想像，配襯唔同嘅衫，甚至襯番一啲原本已經唔會再着嘅衫，咁樣先係環保。」

拒盲目環保扼殺美感

有了方向，Kenny決定於一○年創立自家品牌Fave，以「not afraid to be unique」作口號，專門用布碎造領飾。「市場上，領飾係樣幾特別嘅item，唔係太多人會留意同欣賞，所以起步嗰陣係有啲難。」Kenny憶述，當時品牌寂寂無聞，收集布碎是整個生產過程中最困難的一環。「嗰陣無咩人識，啲大廠同大牌子會問我拎啲布碎去做咩。」Kenny坦言，曾花大量時間和精神向不同品牌解釋自己的環保創作概念，希望對方可以提供優質布碎，但反應大多是令人氣餒。

除尋找原材料有困難外，設計上亦曾出現瓶頸。「有時想環保啲，用多啲布碎，有時又覺得個設計用其他物料做其實仲好。」Kenny解釋如發覺用其他質料會更好看時，自己絕不堅持用布碎，謝絕「為環保而環保」。

經歷了一段短暫低潮後，二○一二年無疑是Kenny豐收的一年，「設計需要堅持，環保都一樣，我唔怕我嘅設計太特別。」Kenny堅持布碎造領飾及其背後的環保概念，終於打動了整個時裝界，贏得香港設計師協會的環球設計大獎。「依家多咗客問個設計嘅背後意義，唔再淨係睇價錢，我覺得佢哋嘅消費着眼點開始走向環保。」現時Kenny每季推出大概四十款環保領飾，深受客人歡迎，Kenny已成功以行動實踐品牌口號，以特別的環保設計帶領潮流。

記者陳名仲