復活節除咗可以令人放假休息或者盡情享樂之外，原來真係充滿奇迹㗎。好似美國咁吖，維珍尼亞州東岸度假勝地維珍尼亞灘發生險過剃頭嘅九霄空難，一架F18大黃蜂戰機失控撞落民居引起爆炸大火，哈，連同兩名機師在內只係造成九人受傷，冇人因此而小命不保，你話唔係奇迹都唔得。
至於香港，復活節同樣有奇迹，令人讚嘆生命嘅可貴，更加覺得大愛長存。有一位五十三歲嘅特殊學校教師阿秀，舊年由於罹患罕見嘅左右心室同時衰竭，入住瑪麗醫院昏迷不醒一度危在旦夕，到頭來，奇迹出現，死過翻生！
阿秀嘅復活故事到底係點嘅呢？即係咁，舊年十一月尾，有一位善心人士離世之後遺愛人間，無私奉獻捐出器官，阿秀得到心臟移植嘅機會。當然啦，有機會接受換心手術唔代表萬事大吉，一切視乎術後嘅康復進展。事實上阿秀經歷過一段驚心動魄嘅危險期，術後右心操作功能曾經不正常，必須開胸外置儀器協助泵血。吉人天相嘅係，之後嘅情況一日比一日良好，終於戰勝死神重過新生。家陣嘅阿秀積極接受物理治療，希望盡快重執教鞭，為教育事業繼續發光發熱。
呢嗱嗱嗱，講到呢度功夫茶有必要向大家鄭重呼籲，離世之後捐贈器官確係功德無量㗎，冇必要堅持「死有全屍」嘅陳腐心態吖。人生在世匆匆幾十年，赤條條的來，赤條條的去，萬般帶不走，包括臭皮囊，點解唔將自己已經冇用嘅遺體造福有需要人士呢？遺體之內嘅心肝脾肺腎以至於眼角膜，隨時令到幾個病患者徘徊地獄折返人間，滾滾紅塵共襄善舉莫此為甚。古語有云，勿以善小而不為。既然捐贈器官係一件非常之大嘅善事，更加冇理由拒不為之。
講番阿秀嘅復活故事吖，換心手術雖然係舊年年尾做嘅，不過因為有幸安然擺脫鬼門關，所以今年復活節對阿秀別具意義。阿秀仲話，覺得同器官捐贈者心有靈犀：「我感覺到佢將個心交畀我，我需要好好利用佢，貢獻更多！」阿秀更加不忘多謝醫護人員，同時亦感激患病期間得到《東方日報》同《太陽報》嘅幫助。
講真吖，需要善長仁翁捐贈器官嘅人數唔少㗎，淨係計心臟移植已經供不應求。受到冠心病年輕化等等因素影響，目前全港有二十一人輪候換心，較往年同期多出一倍。
所以咯喎，功夫茶不厭其煩再次鄭重呼籲，捐贈器官意義非凡，遺愛人間善莫大焉。以生命延續生命，人哋固然死過翻生，自己都變相復活吖！