教協選舉委員會尋日公布，馮偉華獲得九成半嘅信任票成功連任會長，將於下月正式生效，任期兩年，睇嚟係為佢參選立法會、接張文光棒鋪定路。
馮偉華原本只肯考慮選立法會，擔任教育界代表，幾經心理掙扎至加入埋民主黨，最近頻頻見到佢出嚟為教育界發聲，似乎想為進身立法會儲定彈藥。佢擔任教協會長唔經唔覺已經兩年，教協選舉委員會尋日公布，收番嘅二萬四千幾張有效選票中，「馮偉華閣」獲得二萬三千幾張信任票，馮偉華順利連任會長，至於一手提攜佢嘅張文光就繼續擔任副會長。
馮偉華成功連任相信係意料之內，但面對新政府上場，可唔可以爭取落實十五年免費教育、中學小班教學等，大家惟有拭目以待，睇嚟未來日子，佢應該好充實。