政情：鄧耀邦勸喻用草藥代熊膽
野生黑熊膽汁近年被極力吹捧能醫百病。東華三院總理、「舖王」鄧成波四公子鄧耀邦（Jason）讀緊中醫學博士，佢話自己絕不處方熊膽，勸喻大家唔好用熊膽治病，建議用普通草藥配合運動，一樣有效。
Jason讀針灸推拿，對中藥有唔少認識，佢話熊膽係有一定療效嘅，可以醫治心腦血管病症，所以自古以來已有熊膽入藥。只不過，今時今日嘅熊膽已不復當年，現代活捉黑熊，困住隻熊喺個籠度，再以吸管抽取膽汁。諗都諗到，隻熊長期處於幽閉環境下，誠惶誠恐咁畀人抽汁，唔屈到病就假。病熊嘅膽汁療效有幾高，可想而知。
Jason希望大家講文明嘅同時要保護野生動物，否則啲動物好可能會絕種喎。